കേരളത്തിന്റെ പൊതുജനാരോഗ്യ മേഖലയുടെ കരുത്ത് വിളിച്ചോതുന്ന ഒരു വീഡിയോയാണ് ഇപ്പോൾ സോഷ്യൽ മീഡിയയിൽ തരംഗമാകുന്നത്. കോട്ടയം മഹാത്മാഗാന്ധി സർവകലാശാലയിലെ അഫ്ഗാനിസ്ഥാൻ സ്വദേശിയായ ഗവേഷണ വിദ്യാർത്ഥി മസൂദ് മുസ്ലിം (Masoud Moslem) ആണ് ‘റിയാലിറ്റി ഓഫ് കേരള’ (Reality of Kerala) എന്ന പേരിൽ തന്റെ അനുഭവം പങ്കുവെച്ചത്.
സൗജന്യ ചികിത്സയും മികച്ച സേവനവും ഒരു മൃഗത്തിന്റെ കടിയേറ്റതിനെത്തുടർന്നാണ് മസൂദ് കോട്ടയം മെഡിക്കൽ കോളേജിൽ ചികിത്സ തേടിയെത്തിയത്. ആശുപത്രിയിലെ പുതിയ ബ്ലോക്കിന് മുന്നിൽ നിന്ന് ചിത്രീകരിച്ച വീഡിയോയിൽ, തനിക്ക് ലഭിച്ച മികച്ച സേവനങ്ങളെക്കുറിച്ച് അദ്ദേഹം വാചാലനായി. “കേരള സർക്കാരിന് വലിയൊരു നന്ദി പറയാൻ ഞാൻ ആഗ്രഹിക്കുന്നു. എനിക്ക് സൗജന്യമായി മരുന്നുകളും കുത്തിവെയ്പ്പും ലഭിച്ചു. ഒരു രൂപ പോലും എനിക്ക് ചിലവാക്കേണ്ടി വന്നില്ല” എന്ന് അദ്ദേഹം വീഡിയോയിൽ പറയുന്നു.
സോഷ്യൽ മീഡിയയിൽ തരംഗം ഇൻസ്റ്റാഗ്രാമിൽ പങ്കുവെച്ച് മണിക്കൂറുകൾക്കുള്ളിൽ തന്നെ ലക്ഷക്കണക്കിന് ആളുകളാണ് ഈ വീഡിയോ കണ്ടത്. ഇതുവരെ 3.9 ലക്ഷത്തിലധികം ലൈക്കുകളും ആയിരക്കണക്കിന് ഷെയറുകളും വീഡിയോയ്ക്ക് ലഭിച്ചു കഴിഞ്ഞു. നെഗറ്റീവ് വാർത്തകൾക്കിടയിൽ കേരളത്തിന്റെ യഥാർത്ഥ ചിത്രം ലോകത്തിന് മുന്നിലെത്തിച്ച മസൂദിനെ മലയാളികൾ ഇരുകൈയ്യും നീട്ടിയാണ് സ്വീകരിച്ചത്.
കേരളത്തോടുള്ള സ്നേഹം ഇതാദ്യമായല്ല മസൂദ് കേരളത്തെക്കുറിച്ച് വീഡിയോകൾ പങ്കുവെക്കുന്നത്. കൈപ്പുഴയിലെ ഗ്രാമീണ ഭംഗിയും, ഏറ്റുമാനൂർ ക്ഷേത്രത്തിലെ ഹോളി ആഘോഷവും, ഇലിക്കൽ കല്ലിലെ യാത്രയുമെല്ലാം അദ്ദേഹം തന്റെ സോഷ്യൽ മീഡിയ പേജുകളിലൂടെ നേരത്തെയും പങ്കുവെച്ചിട്ടുണ്ട്. മലയാളികളുടെ പ്രിയപ്പെട്ട ‘കപ്പ ബിരിയാണി’ ആസ്വദിക്കുന്ന വീഡിയോയും ഇദ്ദേഹത്തിന്റെ പേജിലുണ്ട്.
വിവാദങ്ങൾക്കും രാഷ്ട്രീയ തർക്കങ്ങൾക്കുമപ്പുറം, സാധാരണക്കാരന് താങ്ങാവുന്ന മികച്ച ചികിത്സാ സൗകര്യങ്ങൾ കേരളം ഇന്നും ഉറപ്പുനൽകുന്നു എന്നതിന്റെ സാക്ഷ്യപത്രമാണ് മസൂദിന്റെ ഈ അനുഭവം.